இன்றைய இறைமொழி. செவ்வாய், 26 மே 2026. தூய எதிர்நோக்குக்கான அழைப்பு

இன்றைய இறைமொழி
செவ்வாய், 26 மே 2026
பொதுக்காலம் 8-ஆம் வாரம்
1 பேது 1:10-16. மாற் 10:28-31

தூய எதிர்நோக்குக்கான அழைப்பு

1. வார்த்தை

‘இயேசு கிறிஸ்து வெளிப்படும்போது உங்களுக்கு அளிக்கப்படும் அருளை முழுமையாக எதிர்நோக்கி இருங்கள்.’ (1 பேது 1:13)

‘முதன்மையானோர் பலர் கடைசி ஆவர். கடைசியானோர் முதன்மை ஆவர்.’ (மாற் 10:31)

இன்றைய வாசகங்கள் முன்மொழியும் ஒரு சொல் ‘எதிர்நோக்கு.’ எல்லாம் நன்றாக மாறும் என்ற மனித நேர்முகப் பார்வை அல்ல. மாறாக, கடவுளுடைய அருளை நோக்கித் திரும்பி நிற்கும் இதயம் கொண்டிருக்கும் ஒழுக்கமே எதிர்நோக்கு.

2. இதயம்

இன்றைய முதல் வாசகத்தில் செயலாற்றத் தயாராக இருக்கிற மனங்களும், கீழ்ப்படிதலுள்ள இதயங்களும், தூய வாழ்க்கை முறைகளும் கொண்டு விளங்குமாறு தன் குழுமத்துக்கு அறிவுறுத்துகிறார் பேதுரு. ‘நீங்கள் தூயவராய் இருங்கள். ஏனெனில் நான் தூயவர்’ என்னும் கடவுளின் சொற்களை மேற்கோள் காட்டுகிறார். நிறைவுள்ளவராக இருப்பது அல்ல, மாறாக, கடவுளுக்கு உரியவராக இருப்பதே தூய்மை.

நற்செய்தி வாசகத்தில் பேதுரு இயேசுவிடம், ‘நாங்கள் எல்லாவற்றையும் விட்டுவிட்டு உம்மைப் பின்பற்றினோம்!’ என்கிறார். தன் செயலுக்காக பெருமை பாராட்டவில்லை பேதுரு. மாறாக, ‘எங்களுடைய அர்ப்பணத்தால் எங்களுக்கு என்ன கிடைக்கும்?’ என்று மனிதத் தேடலை முன்மொழிகிறார்.

எதார்த்தமான வாக்குறுதியைத தருகிறார் இயேசு. அனைத்தையும் இழப்பவர்கள் பெரும்பான்மையாகப் பெற்றுக்கொள்வார்கள் – துன்பங்களோடு சேர்த்து! ஒன்றிப்பிலும், பணியிலும், நிலைவாழ்விலும் மாற்றம் பெறுவதே சீடத்துவம்.

3. வாழ்க்கை

நாம் கொண்டிருக்கிற பற்றுக்களை ஆய்வு செய்து பார்க்க நம்மை அழைக்கின்றன இன்றைய வாசகங்கள். நான் கிறிஸ்துவுக்காக இழந்தவை எவை? இழப்பதற்கு அச்சப்படுபவை எவை? அவரிடமிருந்து நான் எதை எதிர்பார்க்கிறேன்?

பாதுகாப்பு, அடையாளம், அதிகாரம் ஆகியவற்றை எதிர்பார்த்து நான் கிறிஸ்துவைப் பின்பற்றினால், கிறிஸ்து என் எதிர்நோக்கைத் தூய்மைப்படுத்துகிறார். நாம் கொண்டிருப்பதை வைத்து அல்ல, மாறாக, நம் உள்மனச் சுதந்திரமே நம் தூய்மையை அளவிட முடியும்.

தவக்காலம் மற்றும் உயிர்ப்புக்காலம் வழியாக நாம் பெற்றுக்கொண்ட சிறப்பு அருளை அசைபோட்டு வாழ்வாக்க நம்மை அழைக்கிறது இன்று நாம் (மீண்டும்) தொடங்குகிற ஆண்டின் பொதுக்காலம்.

4. பணி

தூய மனச்சுதந்திரத்தை அடைவதற்கான ஏதாவது ஒரு செயலை இன்று நாம் செய்வோம். ஏதாவது ஒரு முணுமுணுத்தை விடலாம். ஒரு ஒப்பீட்டைத் தவிர்க்கலாம். மறைமுகமாக ஏதாவது ஒன்றை தியாகம் செய்யலாம். யாரும் பாராட்டவில்லை என்றாலும் ஏதாவது ஒரு நற்செயலை அவர்களுக்குச் செய்யலாம்.

சொல்: எதிர்நோக்கு
அருள்: கடவுளுக்கு முழுமையாக உரிமையாதல்
பாதை: ஏதாவது ஒரு பற்றை அகற்றுதல்

இறைவேண்டல்

ஆண்டவராகிய இயேசுவே,
மனச்சுதந்திரத்துக்கு என்னை அழைக்கிறீர்.
என் எதிர்நோக்கைத் தூய்மையாக்கி, என் நம்பிக்கைக்கு வலுவூட்டியருளும்.
என் அன்றாட வாழ்வில் என்னைத் தூய்iமாயாக்கும்.
என் கட்டுகளிலிருந்து எனக்கு விடுதலை தாரும்.
அனைத்தையும் உம் அருளாக ஏற்கும் தாராள உள்ளம் தாரும்.
ஆமென்.

அருள்திரு யேசு கருணாநிதி
மதுரை உயர்மறைமாவட்டம்

இது ஒரு ‘யெஸ்னி ப்ரேய்ஸ்’ முயற்சி